يا ترى نفسك تخسي..!! ومش عارفة تبدأي ازاي؟...!! أو مترددة وقلقانة تروحي لدكتور يحرمك من "الشيكولاته" و"البيتزا" و"الشيبسي" و"البيبسي" وكل اللي نفسك فيه..!! وزنك زاد ومش عارفة تلبسي حاجة تناسب سنك..!! بتنهجي وانت ماشية أو لما تطلعي سلم..!! يا ترى جربتي أكتر من ريجيم والحكاية برضه مش نافعة..! يا ترى بعد عذاب الريجيم والحرمان رجعت "ريمة لعادتها القديمة" واللي خسيتيه في شهور رجعتيه وأكتر في أسبوعين..!!
أسئلة كتيرة ومشاكل أكتر بتواجهنا
لما بنقرر نعمل "ريجيم"..!
"اخسر وزنك تكسب صحتك"..
الساونا من العوامل المصاحبة للريجيم، ولكن الساونا لا تعني الاستغناء عن الريجيم، وليست تخسيسا حقيقيا، ولكنها حاجة وقتية.. تدخل الساونا ووزنك 100 كيلو تخرج منها وزنك 96 كيلو وهافرح جدّاً بالأربعة كيلو، ولكن بمجرد ما أشرب ميّه هيرجع وزني تاني.. إذن الساونا ليس لها دور حقيقي في التخسيس ممكن تكون مفيدة في حاجات تانية.
وحزام الساونا نفس الفكرة؟
حزام الساونا بيعمل تخسيس موضعي مع استخدام بعض الحقن الموضعية للدهون، ولكنه وقتي بيزول بسرعة.
هل للإبر الصينية دور في التخسيس؟ وإيه دورها في التأثير على مراكز الإحساس بالشبع؟ قبل 1996 كان هناك اعتقاد أن للإبر الصينية دورا في التخسيس، ولكن ظهرت أبحاث بعد ذلك تؤكد أن الإبر الصينية لا علاقة لها بإنقاص الوزن، وأن الأمر مجرد إيحاء، ولكن قد تكون الإبر مفيدة في علاج الألم المزمن والصداع النصفي... بالمناسبة كنت أستخدم الإبر في التخسيس لما كان الطب بيقول إنها بتقلل الشهية، وبتزود معدل حرق الدهون في الجسم، لكن لما الأبحاث أثبتت عكس كده توقفت عن استخدامها.
الطب النهارده قائم على "الأدلة"، وحكاية إن دكتور يقول: أنا عملت بحث أو خبرتي أثبتت لي إن الحاجة دي بتخسس طبعاً ده كلام غير صحيح.
البعض قد يحتاج إلى تخسيس أماكن بالتحديد في الجسم.. يا ترى يمكن الاعتماد على وسائل أخرى مؤثرة؟ ناس كتير جدّاً بتسألني عن ريجيم المناطق.... بمعنى لو بنت وزنها مثالي 50 كيلو جرام، لكن الدهون المتجمعة في منطقة الأرداف أو الذراع بتمنعها من لبس حاجات هي بتحبها... أو لو فيه شخص عايز يفضل جسمه ممتلئ لكن نفسه يخسس منطقة البطن فقط في الحالات دي ننصحهم باختيار أحد هذه البدائل:
اللف التنحيفي.... wrapping وهو عبارة عن لف المنطقة المراد تخسيسها بنوع خاص من الأحزمة وعلى مدى عدة جلسات تقلل المقاس 4 سم أو أكتر حسب عدد الجلسات.. واللف التنحيفي له علاقة بتغيير المقاس يعني لو بتلبسي 46 بعد الجلسات تلبسي 44 مثلاً، لكن ده مش ريجيم، وهو مؤقت بعد ثلاث أو ست شهور ممكن ترجع الدهون تاني تتراكم في نفس المنطقة.
الحقن الموضعي... وهو التعديل "للميزو ثربي" وتعتمد هذه الطريقة على الحقن تحت الجلد للمنطقة المراد تخسيسها بمادة اسمها "فوسفاتي دايل كولين" لتفتيت الدهون.. العملية دي ممكن تحتاج جلستين، الفرق بين الجلسة والتانية شهرين، وممكن لا تحتاج إلى جلسة آخرى والنتيجة فرق في محيط الجسم لعدة سنتيمترات ميزتها أنها طويلة الأمد، ما تفقده لا يعود مرة أخرى.
ولازم نؤكد إن الطريقتين لا علاقة لهما بالميزان يعني بعد اللف أو الحقن الوزن قد يبقى كما هو.. ده مجرد إعادة توزيع الدهون في الجسم؛ للحصول على شكل جسم معين أو ما نطلق عليه الـــ shaping .
هل الحقن آمن ولا يسبب أمراضاً على المدى البعيد؟ حتى الآن منظمة الأغذية الأمريكية لم تصرح به.. لكن الأبحاث التي أجريت عليه أثبتت أنه آمن، وخاصة أن المادة المستخدمة في الحقن يستخدمها الأطباء منذ فترة طويلة في علاج تصلب الشرايين، لكن طريقة استخدام المادة جديدة..
هل "الحقن" في مصر آمن؟؟؟أي حاجة بتتعمل في مصر أو خارج مصر ممكن تتم صح، وممكن تتعمل غلط ويكون لها آثار جانبية مثلاً زي ما فيه جراح تجميل بيعمل عمليات ناجحة فيه جراح ممكن يعمل نفس العملية وتبقى تشويه.. الفكرة أو القاعدة الأساسية لازم أتأكد من الطبيب ومن المكان وأسأل عن التجارب وعمليات الحقن اللي عملها الطبيب من قبل، وهل نجحت وإيه حالة المرضى.
هل يشترط وزن معين؟الحقن مش "ريجيم" لكن هو إزالة البروز الدهنية في منطقة محددة في الجسم.. لو واحدة ذراعها ممتلئ ومسبب لها مشاكل في لبسها أو بوجه عام غير مرتاحة لشكل الدهون في ذراعها بنعمل لها حقن موضعي.. ممكن الحقن يكون لجسم نحيف وممكن يكون لجسم ممتلئ.
وشفط الدهون نفس الفكرة؟..!! فيه كلام كتير عن عمليات شفط الدهون وعن مشاكله لكنه آمن جدّاً لو تم من خلال جراح شاطر، واتعملت العملية في مستشفى لها سمعتها وخبرتها.. لأن الجراح لو غير متمكن في شغله ممكن يشفط دهون أكتر من مكان ومكان تاني ما يعرفش يضبط كمية الدهون فتتحول عملية شفط الدهون من عملية تجميل إلى تشويه.
ولو المستشفى لا تتمتع بقدر كافٍ من النظافة ممكن الجرح يتلوث ويلتئم وهو ملوث، فتحصل مشاكل ومضاعفات خطيرة للمريض قد يدفع حياته ثمناً لها.
شفط الدهون بديل للريجيم؟ بالطبع لا.. فيه فرق كبير بين جراحات السمنة والجراحات التجميلية.. مثلا واحدة ولدت ست مرات وبطنها ترهلت جدّاً في الحالة دي هي محتاجة لجراحة تجميلية تزيل فيها جزءاً من بطنها ممكن وزنها يقل لكن بحجم الجزء اللي تم استئصاله فقط..
في عمليات شفط الدهون المريض بيقل أربعة كيلو مش أكتر، والوزن النهائي للمريض لا يظهر إلا بعد ثلاثة شهور بعد العملية.
الرئيسية 
المنشورات 
